O’zbekiston neft va gaz uchun global energiya bozorida iqtisodiy rivojlanish va raqobatbardoshlik uchun muhim rol o'ynaydi. 

Neft va gaz korxonalarining uzoq yillik ishlab chiqarish faoliyati boshqa tarmoqlar qatori mamlakatimiz hududlarini ham ijtimoiy-iqtisodiy rivojlantirishga xizmat qilmoqda. 

14-dekabr kuni “Whyndham” mehmonxonasida Oliy ta'lim, fan va innovatsiyalar vazirligi, Buxoro muhandislik-texnologiya instituti, O'zbekiston Respublikasi Fanlar akademiyasi, «O‘zbekneftgaz» AJ, "Uzbekiston GTL”, Enter engineering,  Buxoro neftni qayta ishlash zavodi, O'zbekiston neft va gaz sanoati ilmiy-muhandislik jamiyati, LUKOIL kompaniyasi hamkorligida "Neft – gaz kimyosi va texnologiyasida muammolar, innovatsion takliflar va yechim" mavzusidagi Xalqaro ilmiy-texnikaviy anjuman tashkil etildi.

Anjumanni tashkil etishdan maqsad Neft-gaz sanoatida yangi bosqich innovatsiyalarini yaratish, texnologik modernizatsiya va “yashil” texnologiyalarni joriy etish, bu borada kadrlar tayyorlashni takomillashtirish hisoblanadi. 

Dastlab, Buxoro muhandislik-texnologiya instituti rektori Sadoqat Siddiqova so’zga chiqib, anjumanning barcha ishtirokchi va qatnashchilarini madaniyat, ilm-fan oʻchogʻi, Sharq gavhari, buyuk olimlar, mutafakkirlar yurti boʻlmish qadim Buxoroda samimiy qutladi.

 

Ilmiy anjumanda I.M. Gubkin nomidagi Rossiya davlat neft va gaz universiteti, Muxtor Auezov nomidagi Janubiy Qozog'iston universiteti, Polotsk Evfrosin nomidagi Polotsk davlat universiteti, MTO gaz-kimyo majmuasi, O‘zbekiston Respublikasi Fanlar akademiyasi Umumiy va noorganik kimyo instituti, Urganch davlat universiteti, Samarqand davlat universiteti, Buxoro muhandislik-texnologiya instituti va boshqa ko’plab ishlab chiqarish korxonlaridan kelgan mutaxassislar neft va gaz sohasidagi ilmiy ma’ruzalari bilan ishtirok etdi.

 

I.M. Gubkin nomidagi Rossiya davlat neft va gaz universiteti Neftni qayta ishlash texnologiyasi kafedrasi mudiri, Rossiya Federatsiyasida xizmat ko'rsatgan fan arbobi, texnika fanlari doktori, professor Vladimir Kapustin:

 

- Neft va gazdan foydalanish faqat transport, isitish va elektr energiyasi bilan cheklanmaydi. Muhim energiya manbai bo'lishdan tashqari, ular farmasevtika, o'g'itlar, erituvchilar va plastmassalarda keng qo'llaniladi. Jahon mamlakatlari iqtisodiyotida ushbu ikki tovarni ishlab chiqarish katta ahamiyatga ega. Neft va gaz qazib olish bilan bog'liq jarayonlar va tizimlar juda murakkab bo’lib, eng zamonaviy texnologiyalarni talab qiladi.