Тадбиркорлик соҳаси азал-азалдан иқтисодиётни ривожлантирувчи соҳалардан бири эканлиги барчамизга маълум. Бугунги кунда республикамизда тадбиркорликни ривожлантириш давлат сиёсати даражасида. Айниқса, хотин-қизларимизнинг тадбиркорлик соҳаси билан шуғулланишлари учун жуда кўп имкониятлар яратиб берилмоқда ва давлат томонидан қўллаб-қувватланилмоқда. 

Жумладан, Ўзбекистон Республикаси Президентининг 2022 йил 28 январдаги "2022-2026 йилларга мўлжалланган Янги Ўзбекистоннинг тараққиёт стратегияси тўғрисида"ги ПФ-60-сонли Фармонининг "Кичик бизнес ва хусусий тадбиркорликни янада ривожлантиришни рағбатлантирувчи ишбилармонлик муҳитини яратиш", - деб номланган 6-бандида тадбиркор ва ишбилармонларимиз учун беш йилга мўлжалланган "Тараққиёт стратегияси", яъни беш йилга мўлжалланган барча имкониятларни амалга ошириш режалари белгилаб берилган.                                                                                                        2022 йилнинг 23 апрел куни Бухоро шаҳар касб-ҳунар мактабида Бухоро муҳандислик-технология институти "Иқтисодиёт" кафедраси, Тадбиркорлик ва бизнес олий мактаби, Бухоро автомобил ва йўллари техникуми, "Келажак сари интилиш" ташкилоти ҳамкорлигида "Тадбиркор аёлларнинг жамиятдаги ўрни" мавзусида семинар-тренинг ва кўргазма ташкиллаштирилди. 

Семинар-тренинг ва кўргазмада "Иқтисодиёт” кафедраси доценти Г.Д. Хасанова, катта ўқитувчилар Н.Н.Расулова, З.Қ.Жумаевалар иштирок этишиб, бугунги кунда кичик бизнесни иқтисодиётни ривожлантиришдаги ўрни, республикамизда тадбиркорлик билан шуғулланаётган ва тадбиркорлик билан шуғулланишни бошламоқчи бўлган хотин-қизларимизга яратилган ва яратилаётган имкониятлар тўғрисида маърузалар қилишди. Тадбирда иштирок этган тадбиркор хотин-қизлар ўзларини қизиқтирган саволларга илмий жавоблар олишди.

“Иқтисодиёт” кафедраси мудири           доц.Бобоев А.Ч.